Tiff! Tiff!! Tiff o!!!
Catch am, hold am!
Wey tyre, wey petrol?
Burn am, burn am o!
If he escape, pen ren..
Na you we go hold join o!
I don tiff, biko forgive me o!
Na hunger waya my pickin dem.
I no be tiff before o,
Na loss I loss my job
Plenty mouth to feed
I dey sorry, na the bread be this…
You be tiff, tiff must kpeme o.
Knock that him head, barawo!
Wey the tyre na? I say, wey petrol?
I say he must kpeme! Kpeme!!!
Who you wey day drag this man?
You wan make we kee you join?
But oga, him don confess na.
Him don drop the bread for ground.
Even bread seller don carry her market go.
Temper justice with mercy nah!
I say leave am . You wan kill person?
The man don confess, apologize join!
He must die o, me wey hungry catch before
I tiff? I no tiff, why him no fit find work?
Na dem dem be that, fine boy wey day tiff.
Na die for him today.
I go kill am, I go stay for police.
Useless tiff, wey dey dress fine.
Oga! Wetin we carry, wetin you throw?
You know am before?
Him don wunjure you before?
You say him tiff, he don drop the bread.
He don beg una? Na wetin?
Na him kill ya dream?
Abeg, clear comot for road.
Pot dem wey day call kettle black.
Kill am now, commit murder.
Knive wey don cut ya finger,
You wan throway am.
©️Adewale Adeniji. 3rd July 2019.